ဘောလုံး အကြောင်း နားပြီး တခြား အကြောင်းအရာလေး ရေးမယ် ဆိုမှပဲ ဘောလုံး အကြောင်းပဲ ထပ်ပြောဖြစ်ဖို့ အကြောင်းဖန်လို့ လာခဲ့ပြန်၏။ ဒီနေ့ မြန်မာစံတော်ချိန် မနက် 2 နာရီခွဲမှာ EPL Boxing Day ပွဲစဉ်များ ဆက်လက် ကစား၏။ United ပွဲလည်း ရှိ၏။ 2 နာရီခွဲ ဆိုတော့ မကြည့်တော့ဘူး အိပ်မယ် တွေးထားလိုက်၏။ ပုံမှန်အားဖြင့်က မနက် 1 နာရီလောက်ထိပဲ နေပြီး အိပ်လေ့ရှိ၏။ မနေ့က သီချင်းနားထောင်နေတာ 2 နာရီထိုးသွား၏။ Telegram & Facebook ခဏ ပွတ်လိုက်တာ 2 နာရီခွဲ သွား၏။ ဪ ပွဲလည်း လာနေလောက်ပါပြီမို့ လူစာရင်းကြည့်ရင်း 5 မိနစ်၊ 10 မိနစ်လောက် ကြည့်ပြီး အိပ်မယ်ကွာပေါ့။
ပွဲစပြီး 4 မိနစ်မှာတင် New Castle က ဦးဆောင်ဂိုး သွင်းယူ၏။ 19 မိနစ်မှာ နောက်တဂိုး ထပ်မံ သွင်းယူ၏။ နှစ်ဂိုးလုံးက တပုံစံထဲ။ အမြင့်ဘောတွေကနေ တဆင့် သွင်းယူသွားခဲ့ခြင်း ဖြစ်၏။ United နောက်တန်း အနေနဲ့ ဒီရာသီမှာ အမြင့်ဘော ဖျက်ထုတ်မှုပိုင်း အတော်လေး အားနည်းလွန်းလှ၏။ Ferdinand & Vidic တို့ အတွဲကို လွမ်းမိ၏။ United တို့ အနေနဲ့ ပထမတပိုင်းလုံး ဘာမှ မယ်မယ်ရရ လုပ်ပြနိုင်ခြင်း မရှိဘဲ New Castle ၏ ကစားကွက်အောက်မှာ မျောသွားခဲ့၏။
ဒုတိယပိုင်းတော့ ဆက်မကြည့် ဖြစ်တော့ပေ။ အရံလူစာရင်းထဲမှာ ပွဲ အဖြေပြောင်းပေးနိုင်သည့် ကစားသမားမျိုး မရှိနေခဲ့ပေ။ United မှာ Team work မရှိသည့်အပြင် Talent player လည်း မရှိနေခဲ့ပေ။ United ၏ ခေတ်က ကုန်လွန်သွားခဲ့ပြီ ဖြစ်၏။ United က ရှုံးပေမယ့် ရှေ့ရက်မှာ ကစားသွားသည့် City ကတော့ နိုင်ပွဲ ပြန်လည် ရယူသွားနိုင်ခဲ့၏။
Liverpool ရဲ့နောက် အဆင့် 2 နေရာကနေ ဖိအားပေးခဲ့သော Chelsea အသင်းကလည်း အဝေးကွင်းမှာ Ipswich Town ကို 2-0 ဖြင့် ရှုံးနိမ့်သွားခဲ့ရ၏။ အမှတ်ပေးဇယား အဆင့် 4 နေရာမှာ ရပ်တည်နေ၏။ United ကို အနိုင်ကစားသွားသည့် New Castle ကတော့ Man City ၏ အထက် အဆင့် 5 နေရာမှာ ရပ်တည်နေ၏။
January လ 5 ရက်နေ့မှာတော့ United တို့ Liverpool အသင်းနဲ့ အဝေးကွင်းမှာ သွားရောက် ယှဉ်ပြိုင် ကစားရမည် ဖြစ်၏။ အင်း ခက်ခဲပြီးရင်း ခက်ခဲနေဦးမည် ထင်ပါရဲ့။
(photo from Manchester United Facebook page)